A biblioteca: un espazo onde nacen historias, aprendizaxes e emocións
Ao longo deste curso, a nosa biblioteca de centro e as bibliotecas de aula convertéronse nun auténtico motor de aprendizaxe. Entre libros, contos e ilustracións naceron proxectos, investigacións, experiencias artísticas e momentos inesquecibles que acompañaron o noso día a día.
Porque para nós, a biblioteca é moito máis ca un lugar onde ler: é un espazo de encontro, de creación, de emocións e de descubrimentos, no que cada libro abre unha porta cara a novas aventuras.
Comezamos o curso entre lendas e historias
Coa chegada do Samaín, a maxia apoderouse das nosas aulas grazas ás contadas de Iseo A Moura e Manuel Fontemoura, que nos mergullaron no mundo das lendas, dos seres fantásticos e da tradición oral galega, facendo voar a nosa imaxinación.
Un recuncho para ler, sentir e relaxarse
Nas aulas de Infantil inauguramos un novo recuncho de relaxación, un espazo pensado para gozar da lectura con calma, descubrir contos sensoriais e explorar diferentes texturas a través dos libros. Un lugar acolledor onde aprender tamén significa parar, observar e sentir.
Os contos como punto de partida
Cada historia converteuse nunha oportunidade para aprender. Un dos contos que máis nos fixo desfrutar foi "¡Fuera de aquí, horrible monstruo verde!", co que traballamos as emocións, os medos e a confianza en nós mesmos mediante diferentes propostas manipulativas e creativas.
Contos para educar en valores
A biblioteca tamén nos acompañou nas datas máis significativas do calendario escolar.
Con motivo do 25 de novembro, Día Internacional da Eliminación da Violencia contra a Muller, tivemos a sorte de recibir a Uxía Morán, que nos agasallou cunha fermosa sesión de contacontos para reflexionar sobre a igualdade, o respecto e os bos tratos.
Do mesmo xeito, no 8 de marzo, Día Internacional da Muller, volvemos compartir unha nova contada con Uxía Morán, descubrindo historias protagonizadas por mulleres valentes, diversas e inspiradoras.
A arte tamén se le
Os libros convertéronse en obras de arte grazas ao noso gran proxecto inspirado no artista e ilustrador Hervé Tullet. As súas propostas enchéronnos de cor, creatividade e liberdade para experimentar, demostrando que a lectura e a expresión artística poden camiñar sempre da man.
Coa chegada da primavera volvemos reencontrarnos coa súa obra, iniciando a nova estación cun conto e unha gran provocación artística que encheu as aulas de cor e imaxinación.
A Semana da Prensa: ler, crear e reciclar
Vivimos unha intensa Semana da Prensa, na que os xornais foron moito máis ca un medio para informarnos.
Comezamos cunha gran provocación utilizando periódicos como elemento de exploración e xogo.
Despois, propuxemos ás familias un reto moi especial: cada neno e nena levou para a casa unha folla de periódico coa misión de transformala nun xogo, nunha creación artística ou nunha actividade para compartir posteriormente na aula.
Esta proposta permitiunos fomentar a creatividade, o consumo responsable, a reciclaxe e, sobre todo, fortalecer a colaboración entre a escola e as familias.
Abril, o mes dos contos
Durante todo o mes de abril celebramos o amor pola lectura dunha maneira moi especial. Cada día, unha familia entrou nas aulas de Infantil para compartir un conto cos nenos e nenas.
Foi unha experiencia chea de ilusión, emoción e complicidade que converteu ás familias nas mellores contadoras de historias e reforzou o vínculo entre a escola e o fogar.
Os contos tamén saen da biblioteca
Ao longo do curso tamén tivemos a oportunidade de vivir historias fóra das aulas.
Visitamos o auditorio para asistir á representación dun conto teatralizado e recibimos no centro a proposta "Vexo, vexo... Xacobeo", unha actividade promovida pola Xunta de Galicia que nos achegou ao Camiño de Santiago a través do teatro e da narración.
Celebrando en familia
Con motivo do Día da Familia realizamos unha manualidade inspirada no conto "Un feitizo de familias", unha fermosa historia que nos permitiu reflexionar sobre a diversidade familiar e celebrar que cada familia é única e especial.
"ABNizando contos": as matemáticas tamén se len
Ao longo de todo o curso desenvolvemos diferentes propostas baixo o título "ABNizando contos", unha iniciativa que nos permitiu achegar as matemáticas ao alumnado de Infantil dun xeito manipulativo, significativo e contextualizado.
Cada conto converteuse nun escenario perfecto para contar, clasificar, comparar, resolver problemas, desenvolver o pensamento lóxico e descubrir as matemáticas xogando.
Entre os títulos que nos acompañaron estiveron El reno de Navidad, 1, 2, 3... a contar cacas, Polo camiño, Que enleada coa piada e Por unha mosca de nada, demostrando que as historias tamén poden ensinar números, cantidades, formas e relacións.
Un curso cheo de historias
Rematamos este curso coa certeza de que cada libro abriu unha nova oportunidade para aprender, crear, pensar, sentir e compartir.
A biblioteca foi, unha vez máis, o corazón do noso centro. Dende ela naceron proxectos, experiencias, conversas, xogos, investigacións e moitas emocións que quedarán gardadas na memoria do noso alumnado.
Seguiremos enchendo as estanterías de historias, porque sabemos que cada conto é unha semente que, co tempo, florece en curiosidade, creatividade e ganas de aprender.
